DESA TANGKIT BARU

Terima kasih anda telah berkunjung di forum " Desa Tangkit Baru " silahkan melakukan registrasi atau masuk menggunakan akun facebook.

Keuntungan registrasi :
~ Anda bisa berkomentar.
~ Membuat topik dan membalas topik.
~ Melihat video dan gambar.
~ Dan tanya jawab

Salam fada idi`
Cucu Fetta Fuang
DESA TANGKIT BARU

AMAN KOMPAK TERTIP INDAH PRODUKTIF

Photobucket Photobucket Photobucket

google+

TAITA WETTUWE

TANGGLA’ IYEWE ULENGNGE

Powered by Forum TangkitBaru

    ALLEPPERENG "Idul Fitri 2"

    Share

    Cucu Fetta Fuang
    Admin

    Jumlah posting : 234
    Bergabung : 24.06.12
    Umur : 31
    Lokasi : Tangkit baru, jambi, indonesia

    ALLEPPERENG "Idul Fitri 2"

    Post  Cucu Fetta Fuang on 09/08/12, 03:10 am

    بِسْمِ اللهِ الرَّحْمَنِ الرَّحِيْمِ

    اَلسَّلاَمُ عَلَيْكُمْ وَرَحْمَةُ اللهِ وَبَرَكَاتُهُ

    اَللهُ اَكْبَرُ اَللهُ اَكْبَرُ اَللهُ اَكْبَرُ, اَللهُ اَكْبَرُ اَللهُ اَكْبَرُ اَللهُ اَكْبَرُ, اَللهُ اَكْبَرُ اَللهُ اَكْبَرُ اَللهُ اَكْبَرُ, اَللهُ اَكْبَرُ كَبِيْرًا وَالْحَمْدُ للهِ كَثِيْرًا وَسُبْحَانَ اللهِ بُكْرَةً وَاَصِيْلاً, لاَاِلَهَ اِلاَّ اللهُ اَللهُ اَكْبَرُ, اَللهُ اَكْبَرُ وَللهِ الْحَمْدُ.

    اَلْحَمْدُ للهِ الَّذِى وَقَفَنَا ِلاِتْمَامِ شَهْرِ الصِّيَامِ وَاَعَانَنَا عَلَى الصِّيَامِ وَالقِيَامِ وَجَعَلْنَا مِنْ خَيْرِ اُمَّةٍ اُخْرِجَتْ لِلنَّاسِ اَحْمَدُهُ عَلَى تَوْفِيْقِهِ وَهِدَايَتِهِ. اَشْهَدُ اَنْ لاَ اِلَهَ اِلاَّ اللهُ وَحْدَهُ لاَ شَرِيْكَ لَهُ اِقْرَارًا بِرُبُوْبِيَّتِهِ وَجَلاَلِهِ وَعِزَّتِهِ وَاَشْهَدُ اَنَّ سَيِّدَنَا مُحَمَّدًا عَبْدُهُ وَرَسُوْلُهُ الْمُصْطَفَى مِنْ سَائِرِ خَلْقِهِ مِنْ اِنْسِهِ وَجِنِّهِ وَاُصَلِّى وَاُسَلِّمُ عَلَى سَيِّدِنَا وَحَبِيْبِنَا مُحَمَّدٍ وَعَلَى آلِهِ وَاَصْحَابِهِ وَمَنْ تَبِعَهُ مِنْ جَمِيْعِ اُمَّتِهِ. اَمَّا بَعْدُ:

    فَيَااَيُّهَا الْعَائِدُوْنَ وَالْفَائِزُوْنَ, اِتَّقُوا اللهَ حَقَّ تُقَاتِهِ وَافْعَلُو الْخَيْرَ واتْرُكُو الشَّرَّ لَعَلَّكُمْ تَفُوْزُوْنَ بِعِنَايَتِهِ وَهِدَايَتِهِ. وَقَالَ اللهُ تَعَالَى فِى الْقُرْآنِ الْكَرِيْمِ:

    وَلِتُكْمِلُوا الْعِدَّةَ وَلِتُكَبِّرُوا اللهَ عَلَى مَاهَدَاكُمْ وَلَعَلَّكُمْ تَشْكُرُوْنَ. (البقرة:۱۸۵). صدق الله العظيم.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Sining umma selleng engkae riamasei ri Puangallataala

    Masero sitinajasiki patarakkai pappojitta nennia asukkurukeng marajata lao ri arajang kuasanna Puangallataala nasaba pammasenamua lao pada ridi maneng natopada engkasi nawereng asalamakeng nennia wettu pada makkai ajeta, soeyyangngi limatta nasibawai ati caddiorio nennia tappa cabberuberu, natopada engkana maddeppungeng ri lalenna iyae onrongnge sipakario rennu delain akkatta sangadinna pada melomiki pannessai aleta ata mateppe’ tongettongeng, ata lolongengnge asalewangeng maraja iyanaritu massu pole ri uleng ramalang nasibawai ati macinnong watakkale mapaccing natopada mapaccing maneng pole ridosadosae.

    Salawa nennia pappassalama, mamuare’gi Puangallataala engkamui simata patabbollompolloi appalanna nennia pammasena lao ri Nabikkeng Muhammad saw, rikeluargana, sahaba’na, nennia iyamanenna tau makkacoerieyengngi iya engkae simata mattugengkeng ri lalenna watakkalena sipa’ attongettongenge patarakkai aseng marajana nennia agamana Puangallataala.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Tellesangngi assisellengenna wennie nennia essoe, simata mompo materuteru narekko labui essoe takkappoi wennie, narekko labei wennie mompoi essoe gangkana tenrisennasennaha nasalaisi uleng ramalang.

    Nasalai tongenni uleng ramalang, uleng tiwie deceng appalang mallepi-leppi, pura engkani tahangngi anreta nennia inutta sikira-kira pappoji lao ri uleng ramalang, podo bare engkai mangangroangroki ri olona Puangngallataala. Engkalaloko uleng ramalang sabbiwi siningna amala madecetta lolloi siningna amala majae.

    Upepaha, alabappaha, asarongeppaha napunnai tau mallakulakue pogau amala madeceng ri lalenna uleng ramalang nasaba mapaccing sisengngi pole ri dosae, pada toha apaccingenna ana loloe baru rijajiangnge ri indona.

    شَهْرُ رَمَضَانَ شَهْرٌ كَتَبَ اللهُ عَلَيْكُمْ صِيَامَهُ وَسَنَنْتُ لَكُمْ قِيَامَهُ فَمَنْ صَامَهُ وَقَامَهُ اِيْمَانًا وَاحْتِسَابًا خَرَجَ مِنْ ذُنُوْبِهِ كَيَوْمِ وَلَدَتْهُ اُمُّهُ. (رواه ابن ماجه والبيهقى)

    Uleng ramalang uleng nawajikeng Puangallataala rikotu mennang mappuasa ri essona nennia risunnakekko mattarawe ri wenninna, niginniging tau mappuasa nennia mattarawe nasaba’ teppe’ tongettongeng nennia simatami lao ri Puangallataala, majeppu massui pole ri dosadosana padatoha ana baru ri jajiangnge pole ri babuana indo’na.

    Majeppu ada ripakkelorie tau laba tau saro iyanaritu tau saukininnawae matti ri lalenna suruga anyamengnyamengengnge agiagi nacinnai iyatonaro engka ri olona iyakkeppaha onroonrong riebbue pole ri ulawengnge nennia salakae, padatoha narampe Puangngalataala ri lalenna Korangnge:

    اِنَّ الَّذِيْنَ آمَنُوا وَعَمِلُوا الصَّالِحَاتِ اِنَّا لاَ نُضِيْعُ اَجْرَ مَنْ اَحْسَنَ عَمَلاً. (الكهف:۳۰)

    Majeppu wawang engkae mateppe’ nennia napada pogau amala madeceng, majeppu pura de napassiyasiyai appalanna lao ri tau engkae pogau’i amala’na nasaba’ madeceng.

    اُولَئِكَ لَهُمْ جَنَّاتُ عَدْنٍ تَجْرِى مِنْ تَحْتِهِمُ اْلاَنْهَارُ يُحَلَّوْنَ فِيْهَا مِنْ اَسَاوِرَ مِنْ ذَهَبٍ وَيَلْبَسُوْنَ ثِيَابًا خُضْرًا مِنْ سُنْدُسٍ وَاِسْتَبْرَقٍ مُتَّكِعِيْنَ فِيْهَا عَلَى اْلاَرَائِكِ نِعْمَ الثَّوَابُ وَحَسُنَتْ مُرْتَفَقًا. (الكهف:۳۱)

    Iyana mennangro pada punnaiwi suruga aradekengnge, simata mallarina ri awana mennangro salo madduparupang, naribelobeloina mennangro ri lalenna suruga nasaba gellang ulaweng, nennia pada napakei ri lalenna ritu pakeyang magawu pole ri sabbe alusue nennia sabbe maumpe’e, rigau engkana pada tudang sanre tassorong ri lebo’na ranjangnge, iyanaro sideceddecenna appalang nennia sideceng-decengna onrong assenangeng ritu.

    Umma selleng malebbi

    Natopada engkana iyae essoe pada massuki lao pasilennerengngi sempajang alleperengnge, pakei pakeang mapaccita sikirakira pannessai tanrang apaccingenna atitta massu pole ri uleng ramalang pakei pakiang mabarutta sikira-kira pannessai tanrang abarungenna sumangetta molai perjuangatta ri wettu mangoloe, nennia pakei pakeang malebbita sikira-kira lambang kemenangan ri lalenna perjuangatta musui hawa nafsutta nasaba’ pakkasiwiyang puasae ri lalenna uleng ramalang, natopada engkana iyae ele’e ri lalenna iyae (masijitta/ongrongnge) pada tudang majjijireng pada mangolo ri kibella’e, poadai takabbere’e, nennia pappojie lao ri Puangngalatala.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Engkatongenni mengra’ro uleng ramalang labe’ tennagilinna massaile muni cinampe’muna mewaki siuju’ rupa, aga nalabe’tona siagae egana pakkasiwiyang natiwie uleng ramalang, namamuare’gi engkamui Puangallataala nilaiki sebagai tau mattunrutunru mewai siragaraga uleng ramalang nennia mattongettongeng papolei pakkasiwiyang puasae, pasilennerengngi sekke’e nennia passidekkae, makkutoparo paimeng patettongngi sempajang tarawe nancajina pappepaccing ri watakkaleta pole ri dosadosae.

    Umma’ selleng malebbi

    Narimakkuannanaro, engkalaloki’ malai puasae sebagai pabbissa nennia pappepaccing ri watakkaleta nasaba’ sikessikkessinna pallollo dosa iyanaritu pakkasiwiyang puasae padatoha makkedanna Nabitta Muhammad saw:

    مَنْ صَامَ رَمَضَانَ اِيْمِانًا وَاحْتِسَابًا غُفِرلَهُ مَا تَقَدَّمَ مِنْ ذَنْبِهِ. (متفق عليه)

    Niginigi tau mappuasa ri uleng ramalang karena teppe’ nennia Puangallataala simata majeppu pura riaddampengengngi dosa maddiolona.

    Nennia engkatokki’ malai sekke’ pittara’e nennia passidekkae sebagai pabbissa ri waramparatta, passessa’ ri pakeyatta, pappepaccing ri anreta gangkanna mapaccittoni watakkaleta, makkedai Puangallataala ri lalenna Korangnge:

    خُذْ مِنْ اَمْوَالِهِم صَدَقَةً تُطَهِّرُهُمْ وَتُزَكِّيْهِمْ بِهَا. (التوبة:۱۰۳)

    Alai pole ri waramparanna mennangro sekke’e nennia passidekkae sikira-kira pabbissa nennia pappepaccing ri watakkalena.

    Narampei Ibnu Misri pau pole ri Jarir makkeda: Iyaro uleng ramalang monroi taggattung ri pallawangenna langie natanae de natarakka menre ri langie sangadinna ipassupi sekke’ pittara’e.

    Narialatona sempajang sunna tarawe sebagai pangantara, mantara’i puasata nennia sekke’ta lao mangolo ri arajang sewwanna Puangallataala untuk pertanggungjawabkangngi. Aga natarima lempuni Puangallataala pakkasiwiyatta natomapaccittongenna pole ri dosadosae.

    Rimungri puratana napaccingngi uleng ramalang nasaba’ engkata remmei aleta ri lalenna uwae puasae siwuleng ettana, nariranginanna ri tuluna sekke’ pittara’e, narirakkoina nasaba’ wellakkessona sempajang sunna tarawe, aga namarakkona mapute mattappa padai putena kaen pute deepa gaga rota’rota’na. Nasimata nesserimaniki simata bissaiwi nennia parakai madecengngi iyae kaen puteta ri saliwenna uleng ramalang nasaba’ uwae sempajang lima wettue, narisabungngi nasaba’ sempajang sunna’ nennia appojipojie ri Puangallataala sarekkuammengngi nasimata engkamui mapute mattappa padatoha naengkaiye naritarona ri lalenna lamari assisompungetta padatta ri pancaji, narigoncinna nasaba’ appesonae lao ri Puangallataala.

    Naikkiyya saisanna rupa tauwe, mamadai ladde’ni uleng ramalang melo padecengiki, اِذَا جَاءَ رَمَضَانُ فُتِحَتْ اَبْوَابُ الْجَنَّةِ narekko takkappoi uleng ramalang ritimpakenni babbanna suruga iyakkiyya alena tommaniha teya muttama,وَغُلِّقَتْ اَبْوَابُ النَّارِ naritutukenna babanna neraka iyakkiyya alenna tommaniha bukkai natama ri lalenna, وَصُفِّدَتِ الشَّيَاطِيْنِ (متفق عليه) naritikkengenna bali marajana iyanaritu setangnge iyakkiya alena tommaniha lokka mallipessangngi, nasaba pangelorennami nala tongeng, nafsunnami simata naccoeri, nennia iblismi nala sellao ri lalenna atuongenna khususnya ri lalenna uleng ramalang.

    Nah acilakangeppaha, asolangeppaha nennia asajureppaha makkutoparo abinasangeppaha napunnai tau engkae mammatumatu sadariwi atassalanna, tobakengngi dosana, naseng kapang alena melo tuo batu tuo mannennungeng ri lalenna iyae lino. Tau makkuaero nasarini alena ri lalenna abinasangnge nateppanni alena ri api mallumpalumpae nasaba iyami napogau natteangnge Puangallataala, nalulu’mi nappesangkangnge Nabitta, napperopero manemmi nappangessiangnge tau panritae, nalluta’luta’ manemmi adanna tau mapparentae, nabantabantani pangajana duae pajajiyanna, nadena najampangiwi pada oroane sellenna. Makkedai Puangallataala:

    وَلاَ تَحْسَبَنَّ اللهَ غَافِلاً عَمَّا يَعْمَلُ الظَّالِمُوْنَ اِنَّمَا يُؤَخِّرُهُمْ لِيَوْمٍ تَشْخَصُ فِيْهِ اْلاَبْصَارُ. (ابرهيم:۴۲)

    Aja’ lalo nengka makkeda iyaro Puangallataala nalupaiwi aga pura napugau tau maggau’ bawangnge (tau madorakae). Majeppu Puangallataala natundami paccallanna gangkanna ri esso pada engkamanenna tauwe pada mitai (iyanaritu esso pamale’na Puangallataala).

    Tau madorakae talinge’manenni makkekkue, engkani pada tobakengngi atasalanna napangoloni rupanna naddararinna atinna lao ri Puangallataala, nasaba tegako maelo lao tennaruntu’ko nainappako natikkeng nareddu nyawata Malakul Maut, natiwiki lao mangolo ri Puangallataala, naduami ongrong mattajeng iyanaritu suruga nennia neraka. Naikkiya muabbokoriwi suruga nakarena muelle’kelle’mi agama Puangalataala. Makkekkue pake manenni parembolomu, baca memengni bacamu, taro memenni masse ulimu nasaba’ nerakatu taoloi, api mallumpalumpatu taomroi teppa, salo dara nennia salo nanamitu muongroi nange, naiyyatonaro muangre minung nasaba pangollina iblis riturusi, jaji sibawakiritu iblis ri lalengna neraka paccallanna Puangallataala.

    وَ لاَ طَعَامٌ اِلاَّ مِنْ غِسْلِيْنٍ. لاَيَأْكُلُهُ اِلاَّ الْخَاطِئُوْنَ. (الحاقة:۳۶-۳۷)

    Degaga anre muni cedde’muna sangadinna dara nennia nana. Nadegaga manrei sangadinna tau madosae (tau mallutaluta’engngi agama Puangallatala).

    Naiyya paccalang kaminang maringengnge ri neraka jahannama iyanaritu ripassandalakiwi rupa tauwe bara api ri lalenna neraka narederedena ota’na nataro pella, narekko maseroni dekkana ripinunni uwae rede nennia ripanreni dara sibawa nana makebbong baunna:

    وَهُمْ يَصْطَرِخُوْنَ فِيْهَا رَبَّنَا اَخْرِجْنَا نَعْمَلْ صَالِحًا غَيْرَ الَّذِى كُنَّا نَعْمَلُ. (فاطر:۳۷)

    Aga napada gora manengna tau lise nerakae makkeda: E Puang, passulaloki pole ri neraka untuk pogau amala saleh iya silaingengnge pada purae ripapole.

    Eh Puang de’na upabbelleki, detona warearei agamamu Puang detona upabbellei nabimu, tau panritamu, detona ugau bawangngi padakku ripancaji.

    Aga naengkalingai tau lise surugae nakkedana, iyamitu mupoadai iyatu adae nasaba mapeddino, menengnge ripalisuko ri linoe majeppu mupogau’ mutoi anu mupueloe naiya makkekkue:

    ذُوْقُوا عَذَابَ الْخُلْدِ بِمَا كُنْتُمْ تَعْمَلُوْنَ. (السجدة:۱۴)

    Pada rasani, paneddingngini paccallanna puangalatala iya mannennungengnge, iyanatu pamale’na sininna purae pada mupapole ri lino.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Naiyya essoewe mario manenni umma sellengnge gangkanna de naelorengngi agamata engka siajing selletta menderita nennia masussa ri lalenna iyae esso alleperrengnge. Pada toha ri wettuna Nabita engka nengka sewwa wettu runtu’i seddi anana’ teri tassenge’senge’ ri wiring lalengnge ri essona alleperengnge, aga naritanaina ri Nabitta makkeda, magai muteri nak, nappebalina anana’e makkeda, messi nyawaku nasaba amboku matei ri lalenna ammusurengnge, naiya indoku mallakkai paimeng na nalamanengngi waramparakku iya nasalaiyangngekka ambo’ku, naiyya poro ambo’ku nasuroka medde pole ri bolae gangkanna denagaga wedding wonroi, denagaga wedding wanre, denagaga wedding winung, denagaga wedding upake sangadinna iyae upakewe malaunni, marota’ni, masape’sape’toni. Menengngero tuomupi ambo’ku dero wangrasarasa mappakkue, nennia engkatona’ro macculecule padaro anana’ engkaemupa indo/ambo’na sipakario rennu ri essona alleperengnge. Iyanaro pappebalinna anana’ero gangkanna teri Nabitta mengkalingai pappebalinna iyaro anana’e, aga narialana ri Nabitta Muhammad saw rialai sebagai ana angka’.

    Narimakkuannanaro pada engkalaloki perhatikangngi, mamaseiwi pakkere’e, nennia miskingnge makkutoparo ana’ beubeue, ejja gaga nengka gau bawanngi watakkalena makkutoparo warangparangna, tawerengngi ha’na aja tawerengngi adaada weddingnge nassabari namessi nyawana sehingga de narasakangngi riasengnge rio rennu ri lalenna iyae esso alleperengnge, iyatonaro nassabari nariwajakeng sekke pittara’e ri uleng ramalang, tujuanna untuk panrei nennia sumbangngi pakkere’e, miskingnge makkutoparo ana’ beubeue sarekkuammengngi aja naengka ri pallawangetta masessa ri esso allepereng pada toha narampe Nabita saw:

    فَرَضَ رَسُوْلُ اللهِ صَلَّى اللهُ عَلَيْهِ وَسَلَّمَ زَكَاةَ الْفِطْرِ طُهْرَةً لِلصَّائِمِ مِنَ اللَّغْوِ وَالرَّفَثِ وَطُعْمَةً لِلْمَسَاكِيْنِ. (رواه ابو داود وابن ماجه)

    Pura napparelluangngi Nabitta Muhammad saw sekke’ pittara’e sebagai pappepaccing ritau mappuasae pole ri adaada majae nennia ri gau’gau matunae nennia sebagai pappanre ri pakkere’ miskingnge.

    Jaji narimakkuannaro iyatu keluargata jokkae ri kamponna tauwe mamuare’gi makkekkue lolongeng mutoi asennangeng rigau engkana pada sipakariorennu. Pada toha engkae pada rirasakang makkekkue, mammuare’gi demuigaga ri lalenna sara ininnawae ri kampongna tauwe.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Eh, sininna tomatuakku nennia silessurekku makkutoparo anrikku, iya essoewe esso assiarasiaranna umma’ sellengnge, pada laoni mai nato pada giling matu lao massiara nato tuppu ri addeneng malebbina siajing selletta, na tariduppaina sibawa madeceng tariobbina menre ri bolae makkeda enre’ki ri bola tejjali tettapere banna masemase, nato matteruna mampaei lima mapaccingna natosiaddampengeng barakkuammengngi engkaki’ pada mapaccing pole ri dosae.

    Iyae essoe esso amapakeng, esso assiaddampengeng, esso assimadecengeng, esso assiamasemasetta idi umma sellengnge jaji idi masselessureng, massiajing nessereki pasisompungngi lolota, silorongeng paimeng, narekko purai pettu hubungatta siagae ettana, idi mabbali bola nesseriki siamadecengeng, idi massilise kampongnge nessereki siameame paimeng barakkuammengngi rilolongengngi pammasena puangalatala pada toha makkedanna Nabitta:

    اِرْحَمْ مَنْ فِى اْلاَرْضِ يَرْحَمْكَ مَنْ فِى السَّمَآءِ, اِرْحَمْ تُرْحَمْ, اِنَّمَا يَرْحَمُ اللهُ مِنْ عِبَادِهِ الرُّحَمَآءُ.

    Akkamaseko iko rupa tauwe ri lebo’na tanae majeppu namaseikotu Puangallataala. Akkamaseko majeppu riamaseitokkotu. Majeppu Puangallataala namaseiwi atanna engkae posipa’i assiamasemasengnge.

    Narimakkuannanaro pada laoni mai tapada masseddi nasaba asseddingnge papolei awatangeng iya weddingnge nassabari namalomo ri seseta gau’gau’ marejjingnge gangkana makkedai tau riolota: “malilu sipakainge’, mali siparappe, rebba sipatokkong”. Asseddingengnge papolei awatangeng, narimakkuannaro engka laloki pada masseddi idi pabbanuae, bae’ antara seddie golongang sibawa golongang laingnge, antara pemerintah sibawa raya’e, antara masyarakat dengan masyarakat lainnya untuk bangungngi agama malebbina Puangalataala. Makkedai Nabitta:

    اَسْرَعُ الْخَيْرِ ثَوَابًا الْبِرُّ وَصِلَةُ الرَّحِمِ, وَاَسْرَعُ الشَّرِّ عِقَابًا الْبَغْيُ وَقَطِيْعَةُ الرَّحِمِ.

    Deceng iya magattie papole pamale’ iyanaritu appedecengnge (ri Puangallataala makkutoparo ri padatta rupa tau) nennia assisompungeng loloe (ipakessingngiwi asseddingnge, assiamasengnge, makkutoparo assiame’ame’kengnge). Naiyatosi ja magattie lolongeng paccallang iyanaritu aggau’ bawangnge nennia ipappettunnai sompung loloe.

    Jaji idi rupa tauwe khususna idi umma sellengnge de gaga laleng de naripagellori assiamasengnge nennia asseddingnge nasaba’ iyaro gau’e mancajiwi letenna pammasena Puangallataala lao ri pabbanuae.

    اِنَّ الرَّحْمَةَ لاَ تَنْزِلُ عَلَى قَوْمٍ فِيْهِمْ قَاطِعُ رَحِمٍ.

    Majeppu pammasena Puangallataala de napaturungngi ri seddie pabbanua iya engkae ri lalenna pappettui assihubungenna padanna rupa tau.

    لاَ يَدْخُلُ الْجَنَّةَ قَاطِعٌ

    Na pura de nuttama suruga tau engkae pappettui assihubungenna pada rupa tau.

    اَيُّهَا الْعَائِدُوْنَ وَالْفَائِزُوْنَ

    Umma selleng malebbi

    Pura rissenni aleta makkeda pada mapaccing manenni pole ri dosadosae karena wassele’na uleng ramalang iya engkae riattungrutungrui lellungngi decenna, narimongrinnaritu nesseriki simata jagaiwi decenna uleng ramalang iya engkaena mappura lalo sarekkuammengngi engkamui simata maddibola ri watakkaleta aja’ nalariangngi meyong poji kale nennia aja’ nangrei balawo sereati. Naiya weddingnge solangiwi apaccingetta pole ri uleng ramalang iyanaritu pada toha makkedanna Nabitta:

    مَنْ لَمْ يَدَعْ قَوْلَ الزُّوْرِ وَالْعَمَلَ بِهِ فَلَيْسَ للهِ حَاجَةٌ فِى اَنْ يَدَعَ طَعَامَهُ وَشَرَابَهُ. (رواه البخارى)

    Niginigi tau de natettangngi adaada majae bahkan simata napogau’miha majeppu Puangallataala de natarimai puasana koritu muni engkamuna tettangngi angrena nennia inunna.

    Naiya weddingnge palennye’i appalanna puasae, iyanaritu ri makkedanna Nabitta:

    خَمْسُ خِصَالٍ يُفْطِرْنَ الصَّائِمَ وَيَنْقُضُ الْوُضُوْءَ: اَلْكَذِبُ وَالْغِيْبَةُ وَالنَّمِيْمَةُ وَالنَّظَرُ بِشَهْوَةٍ وَالْيَمِيْنُ الْكَذِبَةِ. (رواه الازدى والديلمى) عن انس رضي الله عنه

    Limang rupa wedding rusa’i appalanna puasae nennia rusa’i jenne’e: mabbelle, mappaupau rimongri, mappalettulettu, mitaingngi makkungrai taniae muhrimta nasaba’ hawa nafsu, nennia massumpa palsue.

    Pura rissettoni makkeda engkaki pada massu pole ri uleng ramalang padapadaki ana’ baru rijajiangnge. Bettuanna ada makkeda iyaro idi mappedecengnge ri uleng ramalang mapaccingngi pole ri dosadosae pada anana’e. Narimakkuannaro nesseriki simata mappedeceng ri pajajiatta, aja’ nariadorakai tomatoatta. Makkedai Puangallataala:

    وَبِالْوَالِدَيْنِ اِحْسَانًا اِمَّا يَبْلُغَنَّ عِنْدَكَ الْكِبَرَ اَحَدُهُمَا اَوْ كِلاَهُمَا فَلاَ تَقُلْ لَّهُمَا اُفٍّ وَلاَ تَنْهَرْهُمَا وَقُلْ لَّهُمَا قَوْلاً كَرِيْمًا. (الاسرأ:۲۳)

    Engka laloko pakessingngiwi ampe kedomu ri duae pajajiammu sibawa madeceng, narekko salassewwanna pole ri iya dua iyarega naiya dua monro macoa parakai laloi na aja sisesiseng mupoadai lao ri iya dua mekkeda “awwah” nennia aja mugera’gera’i, appoadako lao ri alena nasaba adaada manyameng kininnawae.

    Umma selleng malebbi

    Iyakkiyya, narekko ritai keadaangnge nennia situasie rekkuangnge, ana’na mancaji raja ri bolana, naparentani tomatoanna, napoatani pajajianna, biasani nagera’ bahkan nanoko indo ambo’na, apalagi narekko macoani indo ambo’na biasani napateppai lima, nacalla bahkan nawuno tomatoanna narekko de naripassilennereng akkatana, biasato engka ana’ nassakareng indo ambona narekko lolongengngi asennangeng, engkana jabatanna, matanreni pangka’na, iyarega sugi tallangkalangkani, najjei temmissengngi tomatoanna nasaba’ kasiasi namajemmeng.

    Asolangeppaha, adorakangeppaha napunnai ana’ makkuaero, naiya ana’ makkuaero de naulle mita deceng ri lino lebbilebbipaha ri esso ri mongrinna Puangallataala. De tenna ri pitanna ri Puangalataala paccallangnge ri lino riolo tennalolongenna paccalang temmakamakae peddina ri esso pamale’na Puangallataala. Mekkedai Nabitta:

    ثَلاَثَةٌ حَرَّمَ اللهُ تَبَارَكَ وَتَعَالَى عَلَيْهِمُ الْجَنَّةَ: مُدْمِنُ الْخَمْرِ وَالْعَاقُّ لِوَالِدَيْهِ وَالدَّيُّوْثُ (اَلَّذِى يُقِرُّ فِى اَهْلِهِ الْحَبَثَ). (رواه احمد والنساء والحاكم)

    Tellungrupa dosa napogau’e rupa tauwe naharangeng Puangallatala tama suruga: parinungnge, tau madorakae ri indo ambo’na nennia oroane mita bawangengngi makkunrainna mappangaddi.

    Umma selleng malebbi

    Adegaha mupikkirikiwi anrasarasana tomatoatta nassabari natoengka idi ana’e ri linoe, nappaki nangidengeng temmakamakana anrasarasana indo’e lettu natampu’ki asera uleng ettana tegitegi jokka kuki natiwi gangkana najajiakki ri linoe massu mita tajang dua bawang appilenna narekko de natuo matei assaleng salama mui ana’na, najajiassiki temmamemme tinrona, temmanyameng anrena, tennarasai wettue, ambo’e de nakkeda pella, de nakkeda kecce, de nakkeda esso, de nakkeda wenni demi untuk atuotuongenna ana’na. Iyakkiyya sisenna maraja dena namaelo sukkurukiwi nennia mattarima kasi ri indo ambona. Ana’ makkuero ribacciwi ri Puangalataala rimakkedanna Nabitta:

    رِضَى اللهِ فِى رِضَى الْوَالِدَيْنِ وَسُخْطُ اللهِ فِى سُخْطِ الْوَالِدَيْنِ. (رواه الترمذى)

    Naiya riona Puangallataala kui riona tau duae pajajiang, naiya baccinna Puangallataala kui baccinna tau duae pajajiang.

    Jaji aja lalo natomadoraka lao ri indo ambo’ta, tapakalebbi’i iya dua nasaba’ wae susu sitetti’na indo’e de narulle mpale’ sangadinna Puangallataalami mulle mpale’i. Narilalenna iyae essoe, nesseriki idi ana’e suju riolona indo ambotta natomellau addampeng, eh indo/eh ambo taddampengengngi anatta taddampengengngi iyamanenna atassalakku, ana’ iya dee naissengngi alena, ana dee naissengngi mattarima kasi’ taparajangnga addampeng. Idi tomatoae nesserini maddempengengngi atassalanna ana’ta, serekkuammengngi natomapaccing maneng pole ri dosadosae massu pole ri uleng ramalang.

    Ri sesena idi tau deena indo ambo’ta, namelo’ki mellau addampeng nadenigaga ri linoe. Napagguruki Nabitta makkeda:

    اَالصَّلاَةُ عَلَيْهِمَا اَيْ اَلدُّعَاءُ وَاْلاِسْتِغْفَارُ لَهُمَا وَاِنْفَاذُ عَهْدِهِمَا مِنْ بَعْدِهِمَا وَصِلَةُ الرَّحِمِ الَّتِى لاَ تُوصَلُ اِلاَّ بِهِمَا وَاِكْرَامُ صَدِيْقِهِمَا. (رواه ابو داود وابن ماجه)

    1. Engkapi sempajangiwi iya dua iyarega nariellau doangeng

    2. Engkapi simata mellau addampengengngi iya dua

    3. Engkapi pasilennerengngi pappasenna iya dua

    4. Engkapi pakessingngiwi assihubungetta lao ri sahaba’na iya dua

    5. Engkapi pakelebbii sellaona iya dua

    Nasimata ri ellau doangenna tuttumpare sarekkuammengngi nariaddampengeng dosana, naripassalama’na ri Puangallataala pole ripaccallanna koritu, rimakkedata:

    رَبِّ اغْفِرْلِى وَلِوَالِدَيَّ وَارْحَمْهُمَا كَمَا رَبَّيَانِى صَغِيْرًا.

    Eh Puang, taddampengengi iya dua nennia tamaseiwi padatoha namaseikku ri wettu baeccuku.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Ambo’ta, indo’ta, neneta, kakata, kuaettopa anri’ta engkae ri lalenna kubburue padapadai tau tallemme’e ri tasi’e nakennai bombang temmaka rajana, nade napaja simata mattajeng bantuang esso wenni iya weddingnge passalamai pole ri bombang marajana paccallanna kubburue, bantuang natajengnge tenia waramparang, tenia doi, tenia ulaweng nakarenna iyamanenna mennanro de nakulle passamai pole ripaccalangnge. Tapi iyaro pada natajengnge paddoangeng pole ri keluargana engkaemupa pada lolang ri lebo’na iyae tanae.

    Jaji narimakkuannanaro passadia memenni tonangeng, passadia memenni lopi untuk ripake malletto ri tasi maloangnge, naiya weddingnge passalamaki matti iyanaritu:

    - Agamamu muala tonangeng nennia lopi

    - Taumu ri Puangalatala muala stir

    - Teppe’mu ri Puangalataalamuala sompe

    - Lempumu muala wise nennia nakoda

    - Amala madecengmu muala lureng

    Sompe’ni nato pada sompe’ natopada caddi rio, aja nakennaki bombang marajana paccalanna kubburue, natopada soro ri tana pammase, natopada sita rupa arungna dewatae iyanaritu ale malebbina Puangalatala Puang masero makkamase ri lino namasero pamasei ri esso ri mongrinna matti insya Allah.

    اَللهُ اَكْبَرُ اَللهُ اَكْبَرُ اَللهُ اَكْبَرُ وَللهِ الْحَمْدُ

    Nariellaumani ri Puangallataala sarekkuammengngi naweremmuki umur’ malampe, tubu majjappa nasimata napakkedallerimuki naengka wedding ripake makkasiwiyang lao ri alena, nennia mamuare’gi engkamui maddampengengngi iyamanenna dosadosata beccu battoa, natosiaddmpedampengettona idi padatta rupa tau padatta massiajing selleng saba’ni nanatarima lempui Puangallataala sininna amala’ madecetta iya engkae pada pura ripatarakka. Aminnn…!!!

    بَارَكَ اللهُ لِى وَلَكُمْ فِى الْقُرْآنِ الْكَرِيْمِ, وَقُلْ رَبِّ اغْفِرْ وَارْحَمْ وَاَنْتَ خَيْرُ الرَّاحِمِيْنَ

      Waktu sekarang 05/12/16, 07:30 pm